قصة حتوته جميله

في حوشنا من ورا زارعين خضروات بامية ورجلة وملوخية واسود وعيييك وطماطم وبصل اخضر
يعني الحَلة بس عندنا دايرة لحمة وزيت وكان رجلة بدور العدس
قمت الصباح لقيت ليك الحاجة عاملة فطير مشلتت مع الشاي ماتقولو لي بتحنكش عليكم
الا بالصح فطير مشلتت لكن بتاع بيت كان هناك فطيرية بايتة من غداء امبارح وقامت الحاجة
طبقتها وحمرتها بالطوة وحلبت ليها ليمونات وسوت فيهم سكر ورشتهم فوق الفطيرية المحمرة
المهم دا ماموضوعنا قعدت شربت الشاي مع الحاجة وقلت ليها انا ماشي السوق اجيب ليكم شنو
قالت جيب معاك لحمة سمحة كدا وجيب معاك العيش قلت ليها اجيب ليك عدس نسوي رجلة
قالت الرجلة حشيناها امبارح وادينا منها لناس فلانة وناس علانة
طيب نفسي في بامية مسبكة كدا قالت امبارح العصر جات هناي ديك ولقططها طيب باقي شنو نطت زوجة اخوي وقالت الملوخية
قلت ليها انتي عارفة الملوخية ماقاعد ادورها قالت الاسود موجود قلت ليها لا انا بجيب معاي بامية
قالت خلاص كويس قلت ليها نزرع البامية يأكلوها ناس الحِلة ملح ونحنا نشتري من السوق قالت الجيران لبعض ياوليدي
لكن ياحاجة الكرم بتاعك دا زايد عن حدو قالت يمكن ظروفهم صعبة ماعندهم حق الخضار وعندهم وليدات صغار
المهم رحت السوق وقعدت مع اصحابي وقضيت شغلاتي الماشي ليها السوق واتأخرت باللحمة والخضار
رحت للحاجة وقلت ليها الظاهر اليوم ماعندنا نصيب نأكل طبيخ سوي فتة سليقة
ورحت اخدت لي نومة وصحاني ود اخوي للغدا وجيت قعدت في الصينية وعينك تشوف العجب
اولا الحاجة عملت فتتها باللحمة وكانت متوسطة الصينية وفي الاطراف اتخيلو شنو الموجود
صحن رجلة كاربة وصحن بامية مسبكة والسلطة جنبهم قمت قلت ليهم دا شنو الحاجة قالت رسلوه ليها علشان تضوقو
واول لقمة لسة ماختيها في خشمي القالك شافع بيكورك للحاجة قلت ليه مالك بتبح من بره ماتجي داخل الزوق جبتو من وين الليلة
ويجي داخل الشافع وشايل في ايدو صحن هنا اخوي قال الناس ديل حاصل شنو الليلة كل واحد داخل بصحنو
سالتو قلت ليه دا شنو قال امي قالت لي وديه لخالتي علشان تضوق قلت ليه دا شنو دا الدايرنا نضوقو
قال مادي ملوخيتكم لكن الكسرة هيلنا وافتح ليك الصحن القالك كسرة مملحة بملوخية مفروكة
قلنا طيب اقعد اتغدا معانا قال نان مابيرجوني في البيت قلت ليه انت دوب ماوصلتنا هنا هناك بيكون اتغدو وغسلو ايديهم
قام الحاجة مسكت فيه وقالت ليه في السخانة دي مابترجع بعدين قول لامك خالتي مسكتني وحمتني اطلع مابتسوي ليك حاجة
المهم اتغدينا غدوة تقيلة وكاربة وغسلنا ايدينا ونشفناها في هدومنا وسالت ليك زوجة اخوي شديتي موية الشاي في النار قالت لا
كوركت لبت جيراننا شايكم طلع قالت قاعدين نشرب فوقو طيب ناوليني كباية وناولتني كباية شاي صعموطي
شفتو كيف ياناس عطبرة دي حلوة وناسها اللقمة الفي خشمهم بدورو يقسموها للجار
وطبعا كلمة جارعندنا في عطبرة مابتعني جارك بالحيطة بس ناس الحِلة كلهم جيرانك
واكاد اجزم الابيات الجايبها ليكم من من رائعة الاستاذ اسماعيل حسن دي بالاخص نظمها وهو في عطبرة

بلدي أمان ، بلدي حنان وناسا حُنان

يكفكفوا دمعة المفجوع

ويبدّوا
الغير على زاتم

يقسموا اللقمة بيناتم

ويدّوا الزاد حتن كان
مصيرم جوع

يحبّوا الجار

يموتوا عشان حقوق الجار

يضوقوا
النار عشان فد دمعة

وكيف الحال لو شافوها سايلة دموع!

ديل
أهلي .. واللــــــــــه ديل أهلي

البقيف في الدار في نص الدار

وأقول
لي الدنيا. كل الدنيا ديل أهلي